Cultural Narrative - Te Reo

Ka kitea Te Pokapū o Ngā Whare Pukapuka o Manawatū i roto i ngā pātū o Te Āhuru Mōwai. Ka ruku ana te tangata ki te ako i ngā kōrero mō te whare, ka kitea te honohono o te hapori mā roto i te mātauranga, te tūramarama, me ngā hanga tonu o tō tātou takiwā

Ko Te Āhuru Mōwai he wāhi haumaru mō te hapori. He wāhi e whakatairanga ana i te kōingo ako, e whakaea ana i te pākiki, e whai wāhi ai ki te hangarau, e tūhuratia ai ngā ariā me ngā koronga. He wāhi āhuru te whare nei mō ngā taonga ka purutia me te tangata e whakamahi ana i tēnei whare. Ahakoa e whakatairangatia ana ngā pukapuka, ngā tuku ihotanga, me ngā taonga, ka noho te whare nei hei whare haumaru mō te hapori. Ko te ingoa o te whare he mea takoha mai e te mana whenua, e Ngāti Kauwhata

Ko te hanga o te whare e whakaari ana i te hurihuri o te ao, mai i te pitomata ki te whakamahinga o te mātauranga me te hīnātore, te pohewa, te pākiki ka hua ake i te wānanga. Ka ahu mai tēnei i te pūrākau o Te Noho Tata Pū, e kōrero ana mō Kēkerewai me tana tīmata i te wānanga mō te kino o tō rātou noho kōpāpā ko ōna tuākana, ōna tēina i waenga i te piringa a ō rātou mātua, a Ranginui rāua ko Papatūānuku. Ka mōhiotia he ao a waho, he ao wātea, he ao mārama. I tēnei wānanga ka hua ake ngā whare e rua - ko Huaki Pōuri; mō rātou ka hiahia kia wehe ngā mātua e puta ai ki te ao mārama, me Tū te Āniwaniwa: mō rātou ka hiahia kia noho tonu ki te pō. He rite tonu te kitea o te kaupapa o te ao me te pō i roto i ngā kōrero a te Māori.

Ko ngā whare e rua:

• Ka kitea a Tū te Āniwaniwa rāua ko Te Pō i te Pokapū Whare Pukapuka, kei Te Pō ngā wāhi matua (te wāhi o waenga i a Ranginui rāua ko Papatūānuku i mua i te wehenga). Ko Te Pō e hāngai ana ki te pō roa, he wā e roa ai te noho takitahi ki ngā tini āhua o te pō. He pango ngā pae pukapuka e tohu ana i Te Pō, pēnei i ngā tūru me ngā tēpu. I te kohinga pukapuka e tatari ana kia whakamahia e te hapori, ka noho, ka tatari ki te pō. Kei konei te pitomata o te māramatanga e tatari ana kia whakamahia, kia kawea rānei e te tangata me ngā taonga, ngā mātauranga e purutia ana i roto.
• Ko Huaki Pōuri me Te Ao Mārama e whakaarihia ana i te pātū e noho hāngai ana ki te tiriti o roto. I tēnei wāhi, ka kī ngā rūma hui, ngā wāhi hikohiko, me te whare kai ki te tūrama o waho; he wāhi pāhekoheko ēnei. Ko te paheko ki tangata kē atu mā te wānanga me te matapaki, te awheawhe, ngā hōtaka me ngā kaupapa, ka whai wāhi ki te tuku mātauranga me te māramatanga.

Nōu ka kuhu atu i ngā tatau o Te Pokapū Whare Pukapuka, kia titiro iho koe ki ngā whāriki. Ka ārahi te tohu o Te Whāriki i te tangata ki Te Whare Pora, (te whare o ngā mahi raranga) ki te ao tinana. Ko te hunga ka tohia ki tēnei whare, te whare o Hine-te-iwaiwa, ka piki ake ngā ihi rangaranga e rite ai rātou ki te ako. Ko ngā tae kākāriki me te kōwhai i te whāriki e hono ana i ngā tae tuatahi o Ngāti Kauwhata me Te Kaunihera a-Rohe o Manawatū. Ko te ahunga o ngā wāhanga tae e tohu atu ana ki te manga o Mangakino, te manga e hono ana i a tātou ki te awa o Ōroua.

Nōu ka whakatata atu ki te pae whakatau i Te Pokapū Whare Pukapuka, ka titiro whakatemauī, ka kite atu koe i te pou whakairo e whakaahua ana i te wehenga o Papatūānuku rāua ko Ranginui. Kāore i hua ake he whakaae tahi i te wānanga a ā rāua tamariki, heoi, nā Tāne ōna mātua i whakawehe e puta mai ai ngā tamariki i te pōuriuiri ‘ki te whei ao, ki te ao mārama’

Kei muri tonu i te pae whakatau, kei te taiapa arapiki e ahu atu ana ki te huarewa, ka kitea te tauira o te Poutama, e tohu ana i te koke, te whanake, te ako, Nō te wehenga o ōna mātua, ka kake ake a Tāne i ngā rangi ki te rapu mātauranga. He tauira anō tēnei o te hūnuku mai i te pō ki te ao, ki te rapu māramatanga

Ka piki a Tāne ki Te Tihi-o-Manono, ki te rangi tuangahuru mā rua e mōhiotia nei ko Te Toi-o-ngā-rangi. Arā ngā āhua i wero i a ia nōna e piki ana, heoi ka eke tonu ia. I reira, e toru ngā kete o te wānanga i tīkina: Ko te kete-tuatea (mātauranga tupuna), te kete-tuauri (mātauranga tapu), me te kete aronui (mātauranga o te ao hurihuri)

Ko ngā tauira kei runga i te taiapa arapiki o te huarewa e tohu ana i Te Taiao, te ao e noho nei tātou; kei roto tātou, ā, ka karapoti i a tātou - te whenua, te wai, te āhuarangi me ngā mea kaiao. Ka tohu tēnei i te tūhonohono o te tangata me te taiao.

Nōu e hīkoi ana i te tiriti o roto o Te Pokapū, i te papa matua, ka kite atu koe e tino mārama ana ngā wāhi hui me ngā wāhi kaupapa i te tūrama e whiti mai ana i ngā matapihi o waho, o roto hoki. He matapihi, he tauira, he matapihi, he tauira.

Kua whakarākeihia te rūma hui matua ki te tauira o Pātiki. Ka tohu a Pātiki i te huhua o te kai, tērā e whāngai ana i te tinana, engari e whāngai hoki ana i te hinengaro, te whakaaro pohewa, me ngā moemoeā. Ka tohu hoki a Pātiki i te manaakitanga (te tiaki i te tangata), he huhua te tohu nei, kia nui ai mō te katoa.

Ko ngā tae o te wāhi hui matua, ko ngā tae o te moana, te wāhi o te moana e kitea ai te Pātiki. Ka hanumi ngā tae onepū me ngā tae o moana kia rite ai ki te tai puehu i te pūau o te awa, he kāinga anō nō te pātiki.

Hui katoa ngā ruma nei, kua tapaina ko Pātiki. Ina wehea, ko Pātiki Tahuaroa (moana) te rūma rahi ake, ā, ko Pātiki Onepū (onepū) te rūma iti iho.

Mō te rūma hui iti, kua tāngia te tauira o te Ngutu Kākā ki ngā matapihi, tae atu ki te pakitara.

He tupu māori te Ngutu Kākā, e rite nei ōna puāwai ki te ngutu o te Kākā. He waha nui tō te Kākā, ā, ko tēnei wāhi te whakatinanatanga o te manu nei, he wāhi wānanga, matapaki, he wāhi e hui ai te tangata ki te kōrerorero.

Ko te tauira kei ngā matapihi o te rūma o waenga o ngā rūma hui, ko Takarangi. E rua ngā makaurangi kua hono e tohu nei i tā tātou takahi i te ao, mai i tōna tīmatanga, ā, haere tonu ake. Kei te pū o te Takarangi, te orokohanga, te tīmatanga. Ko te wāhi i waenga i ngā makaurangi e tohu ana i Te Ao Mārama me tana hono ki Te Ao Wairua. Ka tohu hoki ngā makaurangi i te tino piringa o Ranginui rāua ko Papatūānuku.

I te tau 1962, i pōtihia a Tui Mayo ki Te Kaunihera o Feilding, i noho atu ai ia mō te 21 tau. Hei heamana o te komiti whare pukapuka me te puna kaukau, ka tohe a Mayo mō tētehi whare pukapuka hou mō Feilding. Nō te tuwheratanga o te whare pukapuka hou i te Hepetema o te 1980, tērā tētehi wāhi i whakakitea ai he tuanui rākau māori papai me tētehi wāhanga pakitara i hangaruatia mai i te whare kaunihera o mua. I tapaina te wāhi nei ki te ingoa o Tui Mayo. Kia whāia te āhua o te Takarangi, ko te pakitara me te tuanui, i reira i te tīmatanga o tēnei haere, kua whakauka, kua whakakitea i te Rūma o Tui Mayo nei

Waihoki, kei te tiriti o roto o Te Pokapū, kei te taha o te rūma o Tui Mayo, tētehi wāhi mō te rangatahi. Ko te tauira kei te matapihi, ko Mangōpare e tohu nei i te kaha, te māia, te rangatira, te urupū (me ētehi atu āhua). Ka whai mātou kia whāngaihia ēnei uara ki ā tātou rangatahi.

Ko te ingoa o te wāhi rangatahi nei, ko Te Whanga, he wāhi e huihui ai te Mangōpare.

Kei waho, kei te Tiriti o Stafford, ka kitea atu rā i ngā pātū te tauira o Ihirangaranga. Kia titiro atu koe ki te papa tuarua, ka kitea ngā whetū e whitu o Matariki; Ko Waitī, ko Waitā, ko Waipunarangi, ko Ururangi, ko Tupuānuku, ko Tupuārangi rātou ko Matariki, e whakatau nei i te hunga e tae mai ana ki Te Āhuru Mōwai